Daw'r canlyniadau ar adeg pan mae penawdau cenedlaethol wedi tynnu sylw at yr heriau y mae llawer o raddedigion yn eu hwynebu wrth ddod o hyd i waith. Er bod deilliannau graddedigion wedi dirywio mewn llawer o brifysgolion ledled y Deyrnas Unedig, mae graddedigion Bangor yn mynd yn groes i'r duedd genedlaethol, gyda mwy o fyfyrwyr yn symud ymlaen i gyflogaeth, astudiaethau pellach a gyrfaoedd sgiliau uchel.
Mae'r canfyddiadau'n adlewyrchu ffocws Prifysgol Bangor ar roi'r wybodaeth, y sgiliau ymarferol a'r profiadau i fyfyrwyr a fydd yn eu helpu i bontio’n llwyddiannus i gyflogaeth neu astudiaeth bellach.
I ddarpar fyfyrwyr sy'n ystyried eu hopsiynau prifysgol, mae'r canlyniadau diweddaraf yn cynnig sicrwydd bod addysg ym Mhrifysgol Bangor yn darparu'r wybodaeth, y sgiliau a'r profiadau y mae cyflogwyr yn eu gwerthfawrogi, ac yn cefnogi graddedigion i gymryd eu camau nesaf yn hyderus.
Un myfyriwr graddedig sydd eisoes wedi elwa yw Rhodri Williams, a gwblhaodd ei radd yn 2024 ac sydd bellach yn gweithio fel Ymgynghorydd Seiberddiogelwch ac Ymgynghorydd Safonau ISO yn Eryri Consulting Limited.
Dywedodd: "Roedd fy mhrofiad ym Mhrifysgol Bangor yn hynod gadarnhaol. Roedd y staff yn gefnogol ac yn wybodus iawn. Cefais y cyfle i gymryd rhan mewn profiadau na fyddai wedi bod yn bosibl y tu hwnt i'r Brifysgol, gan gynnwys ymuno â chymdeithasau myfyrwyr unigryw a diddorol. Roeddwn i'n drysorydd y Grŵp Deifio Tanddwr am flwyddyn ac fe wnes i fwynhau'r profiad yn fawr iawn."
²Ñ±ð»å»å²¹¾±â€™r Athro Nichola Callow, Dirprwy Is-ganghellor (Addysg a Phrofiad Myfyrwyr), "Mae dewis prifysgol yn un o'r penderfyniadau mwyaf y gall unigolyn ei wneud, felly mae'n galonogol gweld y canlyniadau hyn yn dangos gwerth addysg ym Mhrifysgol Bangor." Rydym eisiau i bob myfyriwr adael gyda'r hyder, y sgiliau a'r profiad i gyflawni eu huchelgais, boed hynny'n dechrau gyrfa, parhau â'u hastudiaethau neu ddilyn cymwysterau proffesiynol."
