Mae'r flwyddyn 2021 yn garreg filltir gerddorol bwysig i Brifysgol Bangor, 100 mlynedd ers i ET Davies ddod yn Gyfarwyddwr Cerdd llawn amser cyntaf y Brifysgol yn 1921.
Mae'n amser i ddathlu hanes cyfoethog cerddoriaeth ym Mangor, gan edrych yn ôl dros ganrif o ddigwyddiadau cerddorol, ac yna ymlaen i'r 100 mlynedd nesaf, gyda rhai datblygiadau newydd cyffrous ar y gweill.
Rydym yn eich gwahodd i ymuno â ni wrth inni ddathlu ein canmlwyddiant gyda chalendr llawn digwyddiadau, sy'n addo rhywbeth i bawb! Cadwch lygad allan dros y misoedd nesaf, wrth i ni ryddhau amserlen gyffrous o gyngherddau, perfformiadau a dosbarthiadau meistr - teyrnged i ansawdd ac amrywiaeth cerddoriaeth ym Mangor a thu hwnt.
Bydd y rhaglen yn cynnwys perfformiadau gan ensembles cerddoriaeth broffesiynol, gan gynnwys Cerddorfa Genedlaethol Gymreig y BBC ac Opera Cenedlaethol Cymru, gyda phob ensemble yn cynnwys gweithiau gan gyfansoddwyr sy'n gysylltiedig â Bangor.
Bydd Adran Cerddoriaeth, Drama a Pherfformio Bangor, wrth gwrs, yn chwarae rhan ganolog yn y dathliadau, gyda llu o ddigwyddiadau cyffrous i ddathlu ymrwymiad yr Ysgol Iaith, Diwylliant a'r Celfyddydau i gelf, cerddoriaeth ac addysg. Bydd cyngherddau gan Gerddorfa Symffoni’r Brifysgol a Chorws y Brifysgol yn dathlu’r canmlwyddiant, trwy gynnwys yn eu cerddoriaeth repertoire a gyfansoddwyd rhwng 1921-22. Bydd ensembles cerddorol y Brifysgol hefyd yn darparu nifer o berfformiadau lliwgar a fydd i gyd yn cynnwys cerddoriaeth a ysgrifennwyd gan gyfansoddwyr Bangor.
Yn ogystal â chyngherddau a pherfformiadau byw, bydd ystod o ddosbarthiadau meistr yn gweld rhai o'r ymarferwyr gorau o bob rhan o'r DU, yn cyflwyno rhaglen o ddosbarthiadau meistr cyffrous i gyfoethogi profiad y myfyrwyr ym Mangor.
Bydd digwyddiadau’n cael eu cynnal, nid yn unig yn adeiladau’r Brifysgol, gan gynnwys Pontio, ond hefyd ledled y ddinas, mewn lleoliadau fel Storiel ac Eglwys Gadeiriol Bangor. Mae'r gymuned wrth wraidd popeth a wnawn, ac mae hyn yn ddathliad, nid yn unig i'r Adran Gerddoriaeth, Drama a Pherfformio, ond i'r Brifysgol gyfan a chymuned Bangor, Gogledd Cymru a thu hwnt.
Ni allwn ddisgwyl i ddathlu 100 mlynedd o gerddoriaeth gyda chi i gyd!